Tayvanda iki pilotun həyatını itirdiyi qəzadan sonra T-34C təlim təyyarələrinin uçuşları qeyri-müəyyən vaxtadək dayandırılıb.
Bu barədə "Taipei Times" nəşri məlumat yayıb.
Ada dövlətin Hərbi Hava Qüvvələrinin rəisi, general-mayor Tszyan İçenin sözlərinə görə, hadisənin səbəbləri araşdırılan müddətdə bu növ aviasiya vasitələrinin istismarı tamamilə dayandırılıb:
"Bütün T-34C təyyarələrinin uçuşlarına ara verilib, pilotlar məşq etmək üçün müvəqqəti olaraq simulyatorlardan faydalanırlar".
Qəzetin məlumatına əsasən, hər iki heyət üzvü təcrübəli aviasiya mütəxəssisləri olub və uçuş zamanı mühərrikin sıradan çıxmasını imitasiya edən mürəkkəb tapşırığı icra ediblər. Qəza iyunun 2-də Qaosyun şəhəri yaxınlığındakı Qanşan aviabazası ərazisində baş verib.
Tszyan İçenin verdiyi bilgiyə görə, təyyarə bu il aprelin 9-da təhlükəsizlik yoxlanışından keçirilib və o vaxtdan bəri heç bir ciddi qüsur qeydə alınmayıb. O əlavə edib ki, pilotların heç biri hər hansı nasazlıq və ya problem barədə xəbərdarlıq etməyib, həmçinin görünüş məsafəsi daxil olmaqla hava şəraiti uçuşların həyata keçirilməsi üçün əlverişli olub. Hərbi Hava Qüvvələri tərəfindən qəzanın yaranma səbəblərini öyrənmək məqsədilə xüsusi əməliyyat qrupu yaradılıb.
