Tozsoran evi təmiz saxlamağa kömək etsə də, düzgün saxlanılmadıqda özü də sağlamlıq problemlərinin mənbəyinə çevrilə bilər.
Rusiyalı infeksionist Mariyat Muxina xəbərdarlıq edir: həddindən artıq dolu toz torbaları təhlükəlidir. Dolu və təmizlənməmiş torbalarda toz hissəcikləri, bakteriyalar, kif göbələkləri, dəri gənələri və toksinlər toplanır.
Bu patogenlər tənəffüs yollarında, qırtlaqda və bronxlarda xəstəliklərə səbəb ola bilər. Tozsoran işləyərkən mikroorqanizmlər və allergenlər yenidən havaya sovrula bilər. Çirklənmiş torbayla təmas dəri reaksiyalarına yol aça bilər.
Mütəxəssis bildirir ki, tozsoranı təmizləyərkən ehtiyatlı olmaq lazımdır. Dolu torbanı açarkən toz və patogenlər otağa yayılır. Bu, uşaqlar, yaşlılar, allergiyası və ya tənəffüs sistemi xəstəlikləri olan insanlar üçün ciddi risk yaradır.
