ABŞ Prezidenti Donald Tramp və ailəsi 2025-ci ildə kriptovalyuta biznesindən 1 milyard dollardan çox gəlir əldə edib.
“The Guardian” federal bəyannamə sənədlərinə istinadən xəbər verir ki, Tramp ikinci prezidentlik müddətində ailəsi ilə birlikdə müxtəlif kriptovalyuta təşəbbüslərinə və rəqəmsal aktivlərə aktiv investisiya yatırıb.
Ötən ilin əvvəlində Tramp ABŞ-ı “dünyanın kriptovalyuta mərkəzi”nə çevirəcəyini açıqlamışdı. Ümumi mənfəətə rəqəmsal pullardan gələn qazancla yanaşı, məhkəmə proseslərindən əldə olunan vəsaitlər, daşınmaz əmlak müqavilələri və royaltilər daxildir.
Ağ Ev rəhbəri vəzifəyə gələndə onun bir çox kriptovalyuta layihəsi startap mərhələsində idi. Hazırda isə bu rəqəmsal bizneslər qazanc həcminə görə prezidentin daşınmaz əmlak portfelinin böyük hissəsini geridə qoyur.
Gəlirlərin kəskin artması federal tənzimləmələrin ləğvi və milyarder investorların fəaliyyəti ilə əlaqələndirilir. “The New Yorker” jurnalının 2025-ci il avqust təhlilinə görə, iki prezidentlik dövründə Tramp və ailəsinin ümumi sərvəti 3.4 milyard dollar artıb.
