ABŞ Prezidenti Donald Tramp "Truth Social" şəbəkəsində süni intellektlə yaradılmış video paylaşıb. Görüntülərdə həkim rolunda olan Tramp Hollivud ulduzlarına "Trampı qəbul etməmə sindromu" diaqnozu qoyur.
Oxu.Az-ın məlumatına görə, bu barədə "The Independent" yazıb. 90 saniyəlik videoda Trampı tənqid edən aktyorların rəqəmsal klonları prezidentin siyasətindən qaynaqlanan "simptomlardan" - depressiya, həyəcan və qocalmadan şikayətlənirlər.
De Nironun süni intellekt versiyası deyir ki, Tramp üzündən nə yeyə, nə də yata bilirdi. Virtual Roberts iddia edir ki, iki il ərzində 20 yaş qocalıb. Virtual O'donnell isə 10 ildən çoxdur bu sindromdan əziyyət çəkdiyini deyir.
Şikayətləri dinlədikdən sonra "Doktor Tramp" məşhurlara müalicə təklif edir: "Saxta xəbərlərdən uzaq durun, dua edin və narahatlıq hiss etsəniz, diyetik kola için".
Videodakı məşhurlar Trampı açıq tənqid ediblər. De Niro onu "azadlığa təhdid", Qoldberq isə "ömürlük diktator" adlandırıb.
