ABŞ Konqresindəki Demokrat senatorlar, Prezident Donald Trampın təsviri olan 250 dollarlıq əsginasın hazırlanmasına ayrılan vəsaitlərin araşdırılmasını tələb edir.
"Axios" portalının məlumatına görə, senatorlar Maliyyə Nazirliyinin Baş İnspektor İdarəsinə müraciət edərək, "qanunsuz 250 dollarlıq əsginas" adlandırdıqları layihənin xərclərini sorğulayıb.
ABŞ qanunvericiliyinə əsasən, pul əsginasları və qiymətli kağızlar üzərində yalnız həyatda olmayan şəxslərin portreti yerləşdirilə bilər. Senatorların məktubunda qeyd olunur: "Əhalinin qiymət artımı ilə üzləşdiyi bir vaxtda, Maliyyə Nazirliyi prezidentin şöhrətpərəstliyi naminə qanunsuz layihəyə resurs ayırmaq əvəzinə, iqtisadi problemlərin həllinə diqqət yetirməlidir."
Maliyyə naziri Skott Bessent bildirib ki, Konqres dəstəkləməyəcəyi təqdirdə Tramplı əsginas dövriyyəyə buraxılmayacaq. "The Washington Post"a görə, əgər bu baş verərsə, Tramp son 150 ildə sağlığında ABŞ banknotuna düşən ilk şəxs olacaq.
