Körpələrlə "şirin-şirin" danışmaq onların nitq inkişafını ləngitmir, əksinə, struktur qavrayışını yaxşılaşdırır. Bu ünsiyyət metodu valideynlə uşaq arasındakı emosional bağı gücləndirir.
Oxu.Az xəbər verir ki, Kolorado Boulder Universitetinin dilçilik üzrə baş elmi işçisi Karen Ştoltsnou "The Conversation" nəşrinə müsahibəsində bildirib ki, bəzən valideynlərə kiçiltmə-əzizləmə formalarından qaçmaq tövsiyə olunur. Lakin sadələşdirilmiş ünsiyyət tərzi uşaqları çaşdırmır, əksinə, dili daha yaxşı mənimsəməyə kömək edir.
Alim izah edib: "Məsələn, 'Bax gör necə qəşəng itdir!' kimi şişirdilmiş cümlələr körpələri çaşdırmır. Bu cür ifadələr onların diqqətini çəkir, nitqdəki qanunauyğunluqları kəşf etməyə və sosial əlaqələri gücləndirməyə kömək edir."
K.Ştoltsnou qeyd edib ki, valideynlər həqiqi sözlər və qrammatik cəhətdən düzgün cümlələrdən istifadə edir, sadəcə yüksək səs tonu, uzadılmış saitlər və yavaşladılmış ritmlə danışırlar. Bu, uşağın diqqətini dilin məzmununa və quruluşuna cəlb edir, sözlər arasındakı sərhədləri aydın hiss etməyə kömək göstərir. Tələffüzdəki səhvlər böyüdükcə təbii şəkildə aradan qalxır.
Mütəxəssis dəqiqləşdirib: "Bütün mədəniyyətlərdə böyüklər instinktiv olaraq körpələrlə 'uşaq dili'ndə danışırlar. Hətta heç vaxt əzizləyici tonda danışmayacağına söz verənlər belə uşaqları görəndə dözə bilmirlər. Tədqiqatçılar müəyyən ediblər ki, körpələr bu xüsusi danışığa daha çox diqqət yetirir."
Maraqlıdır ki, bu ünsiyyət tərzi təkcə insanlara xoş gəlmir. Araşdırmalar göstərib ki, pişiklər də "şirin" tonda danışıldıqda daha müsbət reaksiya verirlər.
