Üzümün gündəlik qidaya əlavə edilməsi insan orqanizminin ultrabənövşəyi şüalanmaya qarşı müqavimətini 30%-dən 50%-ə qədər artıra bilər. Yeni araşdırmalar üzümün dəriyə təsirinin daha geniş olduğunu göstərir.
Oxu.Az xəbər verir ki, bu barədə "Science Daily" məlumat yayıb. Tədqiqatda iştirakçılar iki həftə hər gün üç porsiya təzə üzüm yeyiblər. Alimlər pəhrizdən əvvəl və sonra dərilərinin ultrabənövşəyi şüalara reaksiyasını ölçüblər.
Nəticələr göstərib ki, üzüm bütün iştirakçılarda dərinin müdafiəsini gücləndirib. Dərinin xarici təsirlərə qarşı baryerini formalaşdıran proseslərdə aktivləşmə müşahidə olunub.
ABŞ-dəki Qərbi Yeni İngiltərə Universitetinin professoru John Pezzuto deyir: "Gen ifadəsindəki dəyişikliklər dəri sağlamlığını yaxşılaşdırır. Üzüm qaraciyər, əzələ, böyrək və beyin kimi toxumalarda da gen fəaliyyətinə müsbət təsir edir."
Həmçinin, üzüm pəhrizindən sonra oksidləşdirici stress markeri olan malondialdehid səviyyəsi əhəmiyyətli dərəcədə azalıb. Bu hüceyrə zədələnməsinin minimuma endiyini göstərir.
