Türkiyənin Van vilayətində yaşayan 32 yaşlı azərbaycanəsilli Əhməd Cahanqard Takalo marketdə alış-veriş edərkən bank kartı bloklanıb. Hesabında 1 trilyon lirə görən gənc şoka düşüb.
Oxu.Az Türkiyə KİV-ə istinadən xəbər verir ki, Takalo kartı keçməyəndə sistem xətası düşünüb. Banka gedib çıxarışı yoxlayanda gözlərinə inanmayıb. Balansında 999 milyard 999 milyon 999 min 999 lirə 99 quruş var idi.
10 ildir Türkiyədə yaşayan Takalonun hesabındakı bu məbləğ bank sistemlərində xəbərdarlıq yaradıb. MASAK dərhal müdaxilə edib və hesabı dondurub. Çünki qanuna görə, mənbəyi məlum olmayan böyük məbləğlər araşdırılmalıdır.
Takalo əməliyyat zamanı işçilərin təəccübləndiyini, müdirin bank rəhbərini çağırdığını deyir. Bir aydır hesabına girişi olmayan gənc süni intellektə soruşub: bu pulla nə etmək olar? Cavab: min stadion tikmək, 9 yük maşını qızıl almaq və ya 300 min əhalisi olan ölkə qurmaq.
Məbləğ təxminən 21.8 milyard dollara bərabərdir. Bu, onu Forbes siyahısında ilk 120 milyarder arasına salır. Mütəxəssislər bunun proqram xətası və ya sinxronizasiya problemi olduğunu deyir. Pul sistematik şəkildə geri çəkiləcək və hesab normala dönəcək.
