Kann kinofestivalında iştirak edən venesuelalı gözəllik kraliçası hotel otağında hücuma məruz qalıb.
Oxu.Az "New York Post"a istinadən bildirir ki, taclı gözəl buna dair açıqlama yayıb.
29 yaşlı Andrea del Val "Miss Venesuela 2025" titulunu qazanan modeldir. O, sosial şəbəkələrdə qeyd edib ki, 33 yaşlı stilisti Covanni Laquna Fransada olarkən ona fiziki xəsarət yetirib.
Model üzündən qan axarkən özünü videoya çəkib və görüntüləri yayımlayıb. Çəkilişdə ispan dilində danışan del Val deyib: "Baxın, bunu Covanni Laquna etdi. Təbriklər, Covanni, məhz bunu istəyirdim ki, kim olduğunu göstərəsən".
Daha sonra kamerasını ətrafa çevirərək əşyaların səpələndiyi darmadağın otağı göstərib. Videoda Laquna stulda əyləşmiş halda görünür.
Lüks hotelin qonaqları qışqırıq və zərbə səsləri eşidib polisə müraciət ediblər. Covanni polis tərəfindən aparılıb.
Laquna Latın Amerikasında məşhurların və gözəllik kraliçalarının stilisti kimi tanınır. O, 2023-cü ildən "Miss Universe Colombia" müsabiqəsinin yaradıcı direktorudur.
