Xorvatiyanın Split şəhərində "Airbus A220" sərnişin təyyarəsi havaya qalxarkən qəzaya uğrayıb. Təyyarə uçuş-enmə zolağından çıxaraq hasara çırpılıb.
"Croatia Airlines" aviaşirkətinə məxsus təyyarə Frankfurt (Almaniya) reysini yerinə yetirməli idi. Lakin qəfil istiqamət dəyişikliyi nəticəsində təyyarə zolaqdan kənara çıxıb. Otluq ərazidə bir neçə on metr irəliləyən təyyarə turbin hissəsi ilə maneəni uçurub və tam dayanıb.
Hadisə anında göyərtədə 130 sərnişin və 5 heyət üzvü olub. Xəsarət alan olmayıb. Yerli mətbuata görə, təyyarə cəmi 11 aylıq idi. Fövqəladə halın səbəbləri araşdırılır.
