1970-ci ildə Bakıda ziyalı ailəsində anadan olan Əməkdar rəssam Vüqar Əliyev, üç yaşında kağız üzərində cızma-qaralarla sənətə ilk addımını atıb.
Atasının rəsmləri və yaradıcı mühit, onun uşaq dünyasında rənglərin sehrinə çevrilib. 'Uzaq sahillərdə' filmindəki rəssam Mixaylo obrazı isə sənətə marağını daha da artırıb.
Əzim Əzimzadə adına Rəssamlıq Məktəbindən sonra Azərbaycan Dövlət Mədəniyyət və İncəsənət Universitetinin Rəssamlıq fakültəsində təhsil alıb. 40 ildir bu sənətin vurğunu olan rəssam, 2016-cı ildən universitetdə pedaqoq kimi gənclərə yol göstərir.
O, əsərlərində həyatın işıqlı və ümidverici tərəflərini əks etdirir. Musiqini yaradıcılığı üçün ən böyük motivasiya mənbəyi hesab edir. Ona görə hər rəsm əsərinin öz ritmi və melodiyası var.
