Bu gün Xalq artisti Hacıbaba Bağırovun doğum günüdür.
Oxu.Az xəbər verir ki, Hacıbaba Ağarza oğlu Bağırov 1932-ci il iyunun 12-də Bakıda fəhlə ailəsində anadan olub.
Kiçik yaşlarından teatra həvəs göstərib. 1947-ci ildə orta məktəbi bitirərək Azərbaycan Dövlət Akademik Dram Teatrı nəzdindəki aktyor studiyasına daxil olub.
1950-ci ildə Lənkəran Dövlət Dram Teatrında ilk müstəqil yaradıcılıq fəaliyyətinə başlayıb.
1953-cü ildə Azərbaycan Dəmiryol Məktəbini bitirib, Biləcəri deposunda maşinist köməkçisi işləyib.
1960-cı ildə C.Cabbarlı adına Gəncə Dövlət Dram Teatrının aktyor truppasına qəbul olunub.
1962-ci ildə Musiqili Komediya Teatrına dəvət olunub. 26 il ərzində 50-dən çox rol yaradıb.
1974-cü ildə Əməkdar artist, 1982-ci ildə Xalq artisti adlarına layiq görülüb.
1998-ci ildə Şöhrət ordeni ilə təltif edilib.
Hacıbaba Bağırov 6 oktyabr 2006-cı ildə vəfat edib. İkinci Fəxri xiyabanda dəfn olunub.
