Müdafiə naziri general-polkovnik Zakir Həsənovun rəhbərlik etdiyi nümayəndə heyəti Özdere hərbi düşərgəsində keçirilən "EFES-2026" çoxmillətli birgə təliminin gecə mərhələsini izləyib.
Oxu.Az-a istinadən xəbər verilir ki, bu barədə Müdafiə Nazirliyi məlumat yayıb.
Qonaqlar tədbir çərçivəsində təşkil olunan Müdafiə sənayesi sərgisində silah və texnika nümunələri ilə tanış olublar.
Türkiyə milli müdafiə naziri, Azərbaycan, Gürcüstan, Bosniya və Herseqovina müdafiə nazirləri gecə saatlarında şərti düşmən gəmisinin ələ keçirilməsi, sahil mühafizəsi, helikopterlərlə hava kəşfiyyatı və atəş dəstəyi, artilleriya əməliyyatlarını yüksək qiymətləndiriblər.
50 ölkənin hərbi qulluqçularının iştirak etdiyi təlimin məqsədi genişmiqyaslı əməliyyatlarda iştirakçı ölkələrin silah və vasitələrindən birgə istifadə bacarıqlarının təkmilləşdirilməsidir.
Həmçinin kontingentlər arasında koordinasiya, Taktiki Data Link sistemlərinin effektiv istifadəsi, kibertəhlükəsizlik qabiliyyətlərinin inkişafı nəzərdə tutulub.
