Azərbaycanda hərbi qulluqçular şəxsi jetonla təmin ediləcəklər.
Oxu.Az xəbər verir ki, bu məsələ Milli Məclisin plenar iclasında müzakirəyə çıxarılan "Hərbi xidmətkeçmə haqqında" Əsasnamə və "Hərbi vəzifə və hərbi xidmət haqqında" Qanuna təklif edilən dəyişiklik layihəsində əksini tapıb.
Layihəyə əsasən, hərbi qulluqçular xidmət keçdikləri dövlət orqanları tərəfindən şəxsi jetonla təmin olunacaqlar. Jetonun təsviri, xüsusiyyətləri və uçot qaydası müvafiq icra hakimiyyəti orqanı tərəfindən müəyyən ediləcək.
Şəxsi jeton, həlak olmuş, ölmüş və ya xəsarət almış hərbi qulluqçuların şəxsiyyətini müəyyən etmək üçün istifadə edilən, fərdi identifikasiya nömrəsi və qan qrupunu əks etdirən nişandır.
Sənəddə vurğulanır ki, hərbi qulluqçular döyüş əməliyyatları və fövqəladə hallarda həlak ola və ya xəsarət ala bilərlər. Belə hallarda şəxsiyyətin operativ müəyyən edilməsi və tibbi yardımın vaxtında göstərilməsi həyati əhəmiyyət daşıyır. Beynəlxalq təcrübədə geniş tətbiq edilən bu mexanizmin qanunvericiliyə daxil edilməsi təklif olunur.
Layihə müzakirələrdən sonra səsə qoyularaq üçüncü oxunuşda qəbul edilib.
