Baku TV-nin "Hərbi xronika" verilişi Azərbaycan, Türkiyə və Gürcüstan xüsusi təyinatlılarının Tbilisi yaxınlığındakı Muxrovani bazasında keçirdiyi "Qafqaz qartalı - 2026" birgə təlimini təhlil edib.
Təlim təsadüfi deyil. Üç ölkənin ərazisində illik rotasiya ilə keçirilən bu təlim uzunmüddətli hərbi əməkdaşlığın əsas komponentidir.
"Caucasus Eagle" xüsusi təyinatlı bölmələrin real döyüş şəraitinə yaxın ssenarilərdə hazırlığını yoxlayır. Əsas diqqət kiçik elit qrupların koordinasiyalı fəaliyyətinə yönəlir.
Təlim proqramına gizli hərəkət, pusqu əməliyyatları, yaşayış məntəqələrində döyüş, strateji obyektlərin ələ keçirilməsi, diversiya və əks-diversiya, yaralıların təxliyəsi və birgə komanda idarəetməsi daxildir.
Azərbaycan üçün bu təlim NATO standartlarına uyğun taktiki hazırlığı, Türkiyənin döyüş təcrübəsini mənimsəməyi və Gürcüstanla koordinasiyanı gücləndirir.
Türkiyənin "Bordo Berelilər" bölməsinin təcrübəsi və Azərbaycan xüsusi təyinatlılarının peşəkarlığı bilik mübadiləsini artırır.
Müasir müharibədə xüsusi təyinatlıların rolu artır. Pilotsuz sistemlər, radioelektron mübarizə və süni intellekt dəstəyi ilə inteqrasiya olunmuş əməliyyatlar əsas istiqamətlərdəndir.
