ABŞ İrana xaricdə dondurulmuş 100 milyard dollara qədər aktivinin sərbəst buraxılması müqabilində Hörmüz boğazından keçən gəmilərdən rüsum yığılması planından imtina etməyi təklif edib.
Oxu.Az-ın məlumatına görə, "The Wall Street Journal" (WSJ) öz mənbələrinə istinadən bu barədə yazıb.
Bu həftə ABŞ Prezidentinin xüsusi nümayəndəsi Stiven Uitkoff və Donald Trampın kürəkəni Cared Kuşner Dohaya səfər ediblər. Onlar Qətərin vasitəçiliyi ilə keçirilən görüşlərdə iştirak ediblər. Tərəflər Hörmüz boğazının açıq saxlanılması ilə bağlı razılaşmanın icrasını müzakirə ediblər.
Görüşlərdən sonra İranın xarici işlər nazirinin müavini Kazım Qəribabadi bildirib ki, Hörmüz boğazı İranın komandanlığı altındadır.
İran hərbçiləri xəbərdarlıq edib ki, razılaşdırılmamış marşrutla hərəkət edən gəmilər güclü cavabla üzləşəcək.
WSJ-yə görə, Tehran boğazdan keçən gəmilərdən ödəniş almağı planlaşdırır. İranın hesablamalarına əsasən, bu sxem illik 40 milyard dollar gəlir gətirə bilər. Lakin ABŞ və Fars körfəzi ölkələri bu təşəbbüsə qarşı çıxır.
