Tailandda bir kişi ifşa olunmaqdan qorxaraq qonşusuna məxsus böyük məbləğdə uduş qazanan lotereya biletini oğurlayıb və sonra yandırıb.
Oxu.Az "Mothership"ə istinadən xəbər verir ki, hadisə Sukxotxay vilayətində baş verib.
54 yaşlı Sayan adlı qadın üç lotereya bileti alıb və onları yoxlamaq üçün qonşusu Veyunun yanına gedib. Biletlərdən birinin ona 6 milyon bat (təxminən 313 800 manat) məbləğində uduş qazandırdığı məlum olub.
Veyu qadına küçədə uduşlu biletlərlə gəzməməsi üçün onları gecəlik öz evində saxlamağı təklif edib. Lakin Sayan ertəsi gün geri qayıdanda qonşusu ona səhv etdiyini, biletlərdən heç birinin uduşlu olmadığını və onları atdığını deyib.
Qadın bu izaha inanmayaraq Veyunun evinin yaxınlığındakı zibil qutusunu yoxlayıb. Orada yalnız iki lotereya bileti tapılıb.
Bundan sonra Sayan polisə müraciət edib. Veyu və onun həyat yoldaşı Date ifadə vermək üçün polisə çağırılıblar. Cütlük əvvəlcə bileti oğurladıqlarını inkar edib və evlərində axtarış aparılmasına razılıq verib.
Veyu bütün biletləri Sayana qaytardığını iddia etsə də, iyunun 11-də Date uduşlu bileti oğurladığını etiraf edib. O bildirib ki, Sayanın polisə müraciət etməsindən sonra bileti götürərək yandırıb.
Date hesab edib ki, qonşusu çox çəkingən olduğu üçün hüquq-mühafizə orqanlarına şikayət etməyəcək. O həmçinin həyat yoldaşının oğurluqdan xəbərsiz olduğunu bildirib.
