Fransada keçirilən 79-cu Kann Film Festivalının qalibləri açıqlanıb.
"Ən yaxşı film" nominasiyasında "Qızıl palma budağı" mükafatını rumıniyalı rejissor Kristian Munciunun "Fiyord" filmi qazanıb.
Baş rollarda Renate Reinsve və Sebastyan Stenin çəkildiyi dram çoxuşaqlı ailənin Rumıniyadan Norveçə köçündən və yerli cəmiyyətin təzyiqlərindən bəhs edir.
"Qran-pri" mükafatı Andrey Zvyagintsevin "Minotavr" filminə verilib. Münsiflər heyətinin mükafatını isə Valeska Qrizebaxın "Yuxuda görülən macəra" filmi qazanıb.
"Ən yaxşı rejissor" nominasiyasında mükafat üç nəfərə təqdim olunub: Pavel Pavlikovski "Vətən" filminə, Xavyer Ambrossi və Xavyer Kalvo isə "Qara top" filminə görə mükafatlandırılıblar.
"Ən yaxşı kişi rolu" mükafatı Lukas Dontun "Qorxaq" filmində rol alan Valentin Kampan və Emmanuel Maççiyaya verilib.
"Ən yaxşı qadın rolu" nominasiyasında Virjini Efira və Tao Okamoto qalib olub. Aktrisalar Ryusuke Hamaquçinin "Qəfil" filmindəki rollarına görə mükafat alıblar.
