ABŞ-də 81 yaşlı strimer Syu Jako ("GrammaCrackers" kimi tanınır) canlı yayım zamanı polis tərəfindən saxlanılıb.
"Dexerto"nun məlumatına görə, tamaşaçılar silahlı polislərin otağa daxil olduğunu, strimerin isə yatdığını görüblər.
Ertəsi gün "GrammaCrackers" yayım açaraq hadisəni zarafatla danışıb. Polis evə yalan çağırış səbəbindən gəlib. Naməlum şəxs təqaüdçünün güllələndiyini bildirib.
Jako qeyd edib ki, evin qarşısına 20 polis maşını, 5 xüsusi təyinatlı əməkdaş gəlib, binada dronlar uçub. "Məni çölə çıxardılar. Nə baş verdiyini anlamırdım, amma əyləncəli idi. Hətta həzz alırdım", - deyib.
Nəvəsi bildirib ki, polislər yayım avadanlığı ilə ehtiyatla davranıb və kameraya düşməməyə çalışıblar.
"GrammaCrackers" "Minecraft" oyununa həsr olunan yayımlarla məşhurlaşıb. 2025-ci ildə nəvəsinin sarkoma müalicəsi üçün "YouTube" kanalı açıb və 59 min dollar ianə toplayıb. Hazırda nəvənin xəstəliyi remissiya mərhələsindədir.
