ABŞ Federal Rabitə Komissiyası (FCC) xarici dronların idxalına qoyulan məhdudiyyətləri yumşaldıb. Artıq bəzi Çin istehsalı olan yüngül dronların idxalına icazə verilir.
Oxu.Az xəbər verir ki, bu barədə "DroneDJ" nəşri məlumat yayıb. Tənzimləyici orqan Çində istehsal olunan bəzi modellərin milli təhlükəsizliyə təhdid yaratmadığını etiraf edib.
Qərar yalnız "oyuncaq dronlar" kimi tanınan növə şamil edilir. Yeni qaydalara əsasən, dronların kütləsi maksimum 150 qram olmalı, birbaşa görmə məsafəsində 100 metrədək hərəkət etməlidir. Cihazda kamera, izləmə sensorları, internet bağlantısı və şəbəkə xüsusiyyətləri olmamalı, havada qalma müddəti 10 dəqiqəni keçməməlidir.
FCC rəsmiləri bildiriblər ki, bu qərar ABŞ Müdafiə Nazirliyinin rəyi əsasında verilib. Nazirlik qeyd edib ki, bu sadə cihazlar milli təhlükəsizliyə zərər verə biləcək texniki parametrlərə malik deyil.
Xatırladaq ki, 2025-ci ilin dekabrında FCC Çin istehsalı olan bütün PUA-ları qara siyahıya salmışdı. Lakin əvvəlcədən sertifikatlaşdırılmış məhsulların satışına icazə qalmışdı.
