ABŞ-nin Texas ştatının Laredo şəhərində kiçik təyyarə magistral yolda qəzaya uğrayıb.
Oxu.Az "Associated Press"ə istinadən xəbər verir ki, təyyarənin göyərtəsində 6 nəfər olub, onlardan biri həlak olub.
Qəzadan sonra təyyarə alovlanıb. Sosial şəbəkələrdə şahidlərin lentə aldıqları videolarda təyyarənin magistral yolda yanı üstə düşdüyü görünür.
Bir neçə sürücü içəridəki insanları çıxarmaq üçün pilot kabinəsinin pəncərəsini sındırmağa çalışıb. Şahidlərdən biri bildirib ki, təyyarədən üç yeniyetmə və bir "pilota bənzəyən" şəxs çıxıb. Daha bir ekipaj üzvü huşu özündə olmayan sərnişini kabinədən çıxarmağa çalışıb.
Hazırda magistral yolda hər iki istiqamətdə nəqliyyatın hərəkəti dayandırılıb. Qəzanın səbəbi hələlik məlum deyil.
