ABŞ-nin Ohayo ştatında "Old West End" festivalının keçirildiyi məkanın yaxınlığında atışma baş verib.
Oxu.Az TASS-a istinadən xəbər verir ki, bu barədə yerli polis məlumat yayıb.
"Təxminən saat 17:37-də (Bakı vaxtı ilə iyunun 7-si saat 01:37-də) Tolido polisləri bir nəfərin odlu silahla yaralanması ilə bağlı daxil olan çağırış üzrə hadisə yerinə yollanıblar. Hadisə yerinə gələn polislər atışma nəticəsində zərərçəkən bir neçə nəfər aşkar ediblər. Yaralıların çoxu yaxınlıqdakı tibb müəssisələrinə çatdırılıb", - deyə polis "Facebook" hesabında məlumat paylaşıb.
Yerli polis idarəsinin rəis müavini Cozef Heffernan bildirib ki, hadisə nəticəsində azı 12 nəfər yaralanıb, onlardan ikisinin vəziyyəti ağırdır.
Heffernan əlavə edib ki, atəş açan şəxslər iki nəfər olub və onlar, çox güman ki, bir-birinə atəş açıblar. Şübhəli şəxslərin axtarışı davam edir.
