ABŞ Nümayəndələr Palatasının respublikaçı rəhbərliyi Donald Trampın Konqresdən icazə almadan İranla müharibəni dayandırmağı tələb edən qətnamə üzrə səsverməni qəfildən ləğv edib.
Oxu.Az xəbər verir ki, bu barədə "Reuters" məlumat yayıb.
Bildirilib ki, bu addım ABŞ Senatında oxşar təşəbbüsün irəli sürülməsindən iki gün sonra atılıb. Səsvermənin qanunvericilərin Xatirə Günü tətili üçün Vaşinqtonu tərk etməsindən dərhal əvvəl keçirilməsi planlaşdırılırdı.
Bu ilin əvvəlində Palata hərbi səlahiyyətlərlə bağlı əvvəlki üç qətnaməni az səs fərqi ilə bloklamışdı. Respublikaçıların bu məsələdə yekdil dəstəyi partiya daxilində İran müharibəsinə və prezidentə olan güclü inamı vurğulayırdı.
Lakin ABŞ və İsrailin fevralın 28-də İrana zərbələr endirməsindən sonra həftələr keçdikcə səs fərqləri getdikcə azalmışdı - sonuncu qətnamə səslərin bərabər olması səbəbindən qəbul edilməyib. Bəzi respublikaçıların mövqeyini dəyişəcəyi və digərlərinin iştirak etməyəcəyi gözlənildiyi üçün cümə axşamı təklif olunan sənədin təsdiqlənmə ehtimalı yüksək görünürdü. Səsvermə ləğv edildikdən sonra Nümayəndələr Palatasının Xarici İşlər Komitəsindəki əsas demokrat nümayəndə Qreqori Miks jurnalistlərə açıqlamasında bildirib:
"Bizim kifayət qədər səsimiz var idi və onlar bunu bilirdilər".
O qeyd edib ki, palatanın respublikaçı liderləri səsverməni iyunun əvvəlinə qədər təxirə salıblar. Demokratlar və bir neçə respublikaçı, ABŞ Konstitusiyasına əsasən, müharibə elan etmək hüququnun prezidentə deyil, Konqresə məxsus olduğunu xatırladaraq, D.Trampı hərbi gücdən istifadə etmək üçün ondan icazə istəməyə çağırıblar. Onlar, həmçinin Trampın dəqiq bir strategiya müəyyən etmədən ölkəni uzunmüddətli bir münaqişəyə cəlb edə biləcəyindən narahatlıqlarını ifadə ediblər. Əksər respublikaçılar və Ağ Ev isə hesab edir ki, Trampın hərəkətləri qanunidir və ali baş komandan kimi onun yaranan təhlükələrin qarşısını almaq məqsədilə məhdud hərbi əməliyyatlar təyin edərək ABŞ-ni qorumaq hüququ çərçivəsindədir.
