ABŞ və İran arasında atəşkəsin 60 gün uzadılmasını nəzərdə tutan sazişin təfərrüatı açıqlanıb.
"Axios" portalı amerikalı məmura və mənbələrə istinadən yazır ki, bu müddət ərzində Hörmüz boğazı yenidən açılacaq, Tehran isə sərbəst neft sata biləcək.
Həmçinin İranın nüvə proqramının məhdudlaşdırılması ilə bağlı danışıqlar keçiriləcək. Vaşinqton və Tehran 60 günlük qarşılıqlı anlaşma memorandumu imzalayacaq.
Memoranduma əsasən, Hörmüz boğazı keçid haqqı alınmadan açıq olacaq, İran minaları təmizləyəcək. ABŞ isə İran limanlarının blokadasını aradan qaldıracaq və neft satışı üçün sanksiya istisnaları tətbiq edəcək.
Layihədə İranın nüvə silahı hazırlamayacağı, uranın zənginləşdirilməsinin dayandırılması və yüksək zənginləşdirilmiş urandan imtina barədə danışıqlar da yer alır. ABŞ qoşunları yalnız yekun sazişdən sonra çıxarılacaq.
Sənəddə İsrail və "Hizbullah" arasında müharibənin dayandırılması da göstərilib. Ağ Ev fikir ayrılıqlarının yaxın saatlarda aradan qaldırılacağını və sazişin mayın 24-də elan ediləcəyini gözləyir.
