ABŞ Konqresinin aşağı palatası Rusiyaya qarşı sanksiyaların sərtləşdirilməsi və Ukraynaya əlavə dəstək verilməsini nəzərdə tutan qanun layihəsini qəbul edib.
Oxu.Az xəbər verir ki, bu barədə TASS məlumat yayıb. Təşəbbüsün lehinə 226, əleyhinə isə 195 səs verilib.
Qəbul edilmiş sənədə əsasən, Rusiyanın Ukrayna ilə münaqişəni davam etdirməsi, sülh şərtlərini pozması və ya danışıqları lazımi səviyyədə aparmaması mütəmadi qiymətləndiriləcək. Cəza kimi Rusiya rəsmilərinə, maliyyə qurumlarına, neft-qaz sektoruna, kömür və mədən sənayesinə qarşı əlavə sanksiyalar, həmçinin Rusiya mal və xidmətlərinə gömrük rüsumlarının ən azı 500% artırılması planlaşdırılır.
Bundan əlavə, qanun layihəsində 2026-cı və 2027-ci maliyyə illərində Ukraynaya hərbi yardım üçün hər il 300 milyon dollar ayrılması nəzərdə tutulub. Sənədin müəllifi Nümayəndələr Palatasının Xarici əlaqələr komitəsinin baş demokratı Qreqori Miksdir.
