ABŞ dəniz piyadaları korpusu, serjant təlimində "Call of Duty 4: Modern Warfare" videooyunundan istifadə edir.
"Daily Star" nəşrinin məlumatına görə, oyunun modifikasiya edilmiş versiyası hərbçilərə 10-dan çox taktiki ssenari təklif edir. Bu ssenarilər çərçivəsində onlar yüksək stress şəraitində liderlik, kommunikasiya və operativ qərarlar qəbuletmə bacarıqlarını təkmilləşdirir.
Hər missiyadan əvvəl gələcək serjantlar hərəkət planı tərtib edir, sonra sayca üstün olan "düşmən"lə qarşılaşaraq tapşırıqları yerinə yetirirlər.
Komandanlıq nümayəndələri qeyd edir ki, layihənin məqsədi real döyüş şəraitinə yaxın mühit yaratmaqdır. Briqada generalı Metyu Treysi bildirib: "Bu bacarıqlar yüksək təzyiq altında düzgün qərarlar qəbuletmə qabiliyyətinə birbaşa töhfə verir."
Hazırda bu təlim metodu Kuantikoda serjant hazırlıq məktəbində də tətbiq edilir.
