ABŞ və İran danışıqçıları 60 günlük atəşkəs və nüvə proqramı danışıqları haqqında memorandum layihəsini razılaşdırıblar. Lakin ABŞ Prezidenti Donald Tramp hələlik bunu təsdiqləməyib.
Oxu.Az bu barədə "Axios" portalına istinadən xəbər verir. Memorandum Hörmüz boğazından "məhdudiyyətsiz" keçidi nəzərdə tutur. İran qüvvələri gəmiləri saxlamayacaq və rüsum tətbiq etməyəcək. Tehran 30 gün ərzində boğazdakı minaları təmizləməlidir.
ABŞ isə hərbi-dəniz blokadasını ləğv edəcək. Bu proses kommersiya gəmiçiliyinin bərpasına mütənasib şəkildə baş verəcək. Sənəd İranın nüvə silahı hazırlamamaq öhdəliyini də əhatə edir. Yüksək səviyyədə zənginləşdirilmiş uranın utilizasiyası danışıqların ilk mövzularından olacaq.
ABŞ İrana qarşı sanksiyaların yumşaldılmasını, dondurulmuş vəsaitlərin blokdan çıxarılmasını müzakirə etməyə razıdır. "Prezident vasitəçilərə düşünmək üçün vaxt lazım olduğunu bildirib", - deyə amerikalı məmur qeyd edib.
Saziş layihəsi mayın 26-da razılaşdırılıb. Hər iki tərəf ali rəhbərliyin razılığını almalı olub. İran təmsilçiləri razılıq aldıqlarını və imzalanmaya hazır olduqlarını bəyan ediblər. Lakin İran bunu təsdiqləmir.
