ABŞ Administrasiyası yay mövsümündə Kubada potensial hakimiyyət dəyişikliyinə hazırlaşır və bu cür ssenarilər üçün hərbi cavab planları üzərində işləyir.
Oxu.Az xəbər verir ki, bu barədə "Axios" portalı öz mənbələrinə istinadən məlumat yayıb.
Bildirilib ki, ABŞ Prezidenti Donald Tramp hazırda İran ətrafındakı vəziyyətin nizamlanması məsələsi ilə məşğuldur, bundan sonra isə diqqətini Kubaya yönəltmək və orada dəyişikliklərə necə nail olmağı müəyyənləşdirmək niyyətindədir.
Mənbələrin sözlərinə görə, Vaşinqton bütün təsir vasitələri tükənənə qədər Havanaya iqtisadi sanksiyalar tətbiq etməyə davam edəcək, bundan sonra isə hərbi variant mümkündür. Belə ki, keçən ay ABŞ silahlı qüvvələrinin operativ məsuliyyət zonasına Mərkəzi və Cənubi Amerika, eləcə də Karib regionu daxil olan Cənub Komandanlığı adada hərbi əməliyyatların aparılmasına hazırlıq məqsədilə qərargah təlimləri keçirib. Hərbçilər Kubanın pilotsuz uçuş aparatlarına sahib olması və mümkün iğtişaşlara cavab vermə yollarını müzakirə ediblər.
Bununla belə, "Axios"un həmsöhbəti vurğulayıb ki, hələlik heç bir müdaxilə planlaşdırılmır və nəzərdə tutulmur. "Prezident 'irəli' əmrini verəndə, biz hər şeyə hazır olacağıq", - deyə o, əlavə edib.
Bununla yanaşı, portalın yazdığına görə, administrasiya hələlik hakimiyyət dəyişikliyi baş verərsə, Havanada müvəqqəti hökumətə başçılıq edə biləcək kubalı məmurları müəyyən etməyib.
