Avropa İttifaqı (Aİ) Çinin onlayn mağazaları ilə mübarizə və öz pərakəndə ticarətini dəstəkləmək üçün dəyəri 150 avroya qədər olan beynəlxalq bağlamalara 3 avro sabit gömrük rüsumu tətbiq edib.
Oxu.Az-ın məlumatına görə, bu barədə Avropa Komissiyasının rəhbəri Ursula fon der Lyayen öz "X" hesabında bildirib.
"Bu gündən etibarən elektron ticarət çərçivəsində dəyəri 150 avroya qədər olan bağlamalara gömrük rüsumları tətbiq olunur. 30 milyon avropalı pərakəndə satışda çalışır - bu, Aİ-də ən böyük özəl işəgötürəndir", - deyə o yazıb.
Ursula fon der Lyayen əlavə edib ki, bir çox xarici mallar Aİ təhlükəsizlik standartlarına cavab vermir və bu istehlakçılara təhdiddir. O qeyd edib ki, bu tədbir Avropa biznesi üçün ədaləti bərpa edəcək.
