Avropa İttifaqı (Aİ) Ukraynaya ayırdığı 90 milyard avroluq kreditin bir hissəsinin hərbçilərin əməkhaqlarının ödənilməsinə yönəldilməsinə icazə verib. Bu, Aİ-nin Ukraynaya maliyyə dəstəyi tarixində ilk dəfədir.
Ukrayna parlamentinin deputatı Arseni Puşkarenko yerli "Strana" nəşrinə açıqlamasında bildirib ki, yeni qərar sayəsində Silahlı Qüvvələrin şəxsi heyətinə maaşlar artıq xarici kredit vəsaitləri hesabına da verilə biləcək. Daha əvvəl Ukrayna xaricdən gələn yardımları yalnız mülki ehtiyaclara xərcləyir, hərbi xərcləri isə tamamilə daxili büdcədən təmin edirdi.
Lakin prosesdə müəyyən çətinliklər də mövcuddur. Məlumata görə, Aİ kreditin verilmə şərtlərini sərtləşdirə bilər. Ukrayna ilk növbədə illik gəliri 77.4 min avrodan çox olan və güzəştli vergi sistemi ilə işləyən müəssisələr üçün ƏDV dərəcəsini 20 faizə çatdırmalıdır.
Ukrayna isə öz tələblərini irəli sürməkdən çəkinmir. Ölkənin BMT-dəki daimi nümayəndəsi Andrey Melnik Aİ-dən hərbi dəstəyin ÜDM-in bir faizinə qədər artırılmasını tələb edib.
