Almaniya Baş Prokurorluğu "Şimal axını" və "Şimal axını-2" qaz kəmərlərinə qarşı diversiyada iştirak etdiyi iddia edilən ukraynalıya ilk rəsmi ittihamı irəli sürüb.
Oxu.Az ARD telekanalına istinadən xəbər verir ki, ittiham olunan şəxs keçmiş ukraynalı hərbçi Sergey K.-dır. Baş prokuror Yens Rommel ona mülki enerji infrastrukturuna hücum, partlayış təşkili və tikililərin dağıdılması ittihamlarını elan edib.
İstintaqa görə, Sergey K. diversiya qrupuna rəhbərlik edib və 2022-ci ilin payızında partlayıcı maddələr daşıyan "Andromeda" yelkənli yaxtasına komandanlıq edib. Hazırda Hamburqda həbsdədir, 2025-ci ilin yayında İtaliyada saxlanılaraq Almaniyaya ekstradisiya edilib.
Müstəntiqlər mobil telefonunda hücumun hazırlanmasına dair sübutlar aşkarlayıb. İşə əsasən, mülki dalğıcların da olduğu ukraynalı qrupu Baltik dənizinin dibinə kustar partlayıcı qurğular yerləşdirib.
"Şimal axını" Rusiyadan Avropaya qaz ixracı üçün inşa edilmişdi. Birinci xətt Almaniyaya Rusiya qazının 50%-dən çoxunu nəql edirdi. İkinci xətt hələ istismara verilməmişdi.
