Braziliyanın ən böyük narkokartellərindən biri olan "Birinci Paytaxt Komandası"nın (PCC) lideri Jerson Palermo saxlanılıb.
Oxu.Az bildirir ki, bu barədə G1 xəbər portalı məlumat yayıb.
Altı il ərzində ədalətdən yayınan cinayətkar Boliviyanın Santa-Krus-de-la-Sierra şəhərində keçirilən əməliyyat zamanı yaxalanıb.
Braziliyada narkotik ticarəti və polisə hücumlara görə 126 il həbs cəzasına məhkum edilmiş Palermo elit yaşayış kompleksində gizlənirmiş. Yerli hakimiyyət orqanlarının bildirdiyinə görə, o, saxlanılarkən müqavimət göstərib və yaralanaraq nəzarət altında xəstəxanaya aparılıb.
Boliviya xüsusi xidmət orqanları qısa ekstradisiya danışıqlarından sonra saxlanılan şəxsi Braziliya tərəfinə təhvil veriblər.
Jerson Palermo PCC-nin Boliviya və Paraqvaydan kokain tədarükü ilə bağlı əlaqələrində əsas fiqurlardan biri hesab olunub. O, uzun müddət narkotik marşrutlarını və rəqib qruplara qarşı silahlı əməliyyatları koordinasiya edib.
Onun doğulduğu Ponta-Pora şəhəri Braziliya, Paraqvay və Argentina sərhədlərinin kəsişdiyi "üçlü sərhəd" zonasında yerləşir və narkotik ticarəti baxımından strateji nöqtə sayılır.
Palermo uzun müddət tez-tez yerini dəyişməsi və geniş məlumat şəbəkəsi sayəsində həbsdən yayınmağı bacarıb.
