Dünyaya "Barbie Girl" superhitini bəxş edən məşhur "Aqua" qrupu konsert fəaliyyətinə son qoyur.
Oxu.Az xəbər verir ki, bu barədə qrup üzvləri rəsmi sosial şəbəkə hesablarında birgə bəyanat yayıblar.
Qrup iştirakçıları yaradıcılıq tarixlərindəki bu parlaq səhifəni bağlamaq qərarına gəldiklərini açıqlayıblar. Onlar vurğulayıblar ki, "Aqua" onların həyatının çox böyük bir hissəsini əhatə edib və bu yolu birlikdə keçmək musiqiçilər üçün inanılmaz bir şans olub. Sənətçilər, həmçinin bütün dünyanı gəzmək və milyonlarla dinləyici ilə eyni rəqs meydançasında mahnı oxumaq xoşbəxtliyinə nail olduqlarını əlavə ediblər.
Musiqiçilərin sözlərinə görə, uzun illər davam edən birgə fəaliyyətdən sonra onlar yaradılan bu böyük mirası zirvədə ikən qorumaq vaxtının çatdığını anlayıblar:
"İndi bizə elə gəlir ki, xatirələr hələ təzə və güclü ikən, bir-birimizə olan sevgimiz isə zədələnməmişkən pərəstişkarlarla vidalaşmaq üçün ən uyğun zamandır".
"Aqua" qrupu 30 illik fəaliyyətləri ərzində onlara sonsuz dəstək göstərən bütün fanatlarına dərindən təşəkkür edib. Qrupun əsas simaları olan Sören, Lene və Rene bildiriblər ki, bu gedişdən sonra ürəklərində yalnız böyük bir sevgi və minnətdarlıq hissi qalacaq.
Xatırladaq ki, Danimarka qrupu 1997-ci ildə işıq üzü görən "Aquarium" albomu və qlobal hitə çevrilən "Barbie Girl" kult mahnısı ilə dünya musiqi sənayesində böyük rezonans doğuraraq adını tarixə yazdırıb.
