Alimlər artrit, işemiya və osteoporoz kimi xəstəliklərin müalicəsində tətbiq edilə bilən kurkuliqozid A maddəsinin laboratoriya şəraitində süni alınma üsulunu hazırlayıblar.
Oxu.Az xəbər verir ki, Rusiya Təhsil və Elm Nazirliyi bu yeniliklə bağlı TASS agentliyinə açıqlama verib. Məlumata əsasən, həmin birləşmənin təbii mənbəyi sayılan "Curculigo orchis" bitkisi yox olma təhlükəsi ilə üz-üzədir.
Tomsk Politexnik Universitetinin (TPU) mütəxəssisləri İsveçdən olan həmkarları ilə əməkdaşlıq çərçivəsində kurkuliqozid A-nın ilk süni sintez üsulunu tapıblar. Bu innovativ texnologiya təbii ehtiyatların emalı ilə müqayisədə daha yüksək səmərəliliyə malikdir.
Sözügedən maddə hüceyrə ölümünü ləngitmək, iltihabi prosesləri və oksidləşdirici stresi dayandırmaq qabiliyyəti ilə fərqlənir. Tədqiqat qrupu bu maddəni beş mərhələdən ibarət sintez vasitəsilə 90 faizlik səmərə ilə əldə edib. Hazırlanmış yeni texnologiya həm həmin maddənin, həm də onun törəmələrinin stabil istehsalına və klinik sınaqlara cəlb olunmasına zəmin yaradır.
