Fransada qeyri-adi istilər fonunda yeni temperatur rekordu qeydə alınıb. Avropa üzrə isə yüzlərlə insanın öldüyü bildirilir.
"The Daily Mail"in məlumatına görə, ötən çərşənbə Fransa meteoroloji müşahidələr tarixinin ən isti 24 saatlıq dövrünü yaşayıb. Pissos kommunasında havanın hərarəti 44 dərəcəni keçib. Ölkə üzrə orta temperatur 30 dərəcəyə çatıb.
İyunun 18-dən etibarən Fransada su hövzələrində sərinləmək istəyən ən azı 55 nəfər boğularaq ölüb. Rəsmilər əhalini xüsusi təchiz edilməmiş yerlərdə çimərkən diqqətli olmağa çağırıb. Ölənlər arasında "Genqam" klubunun futbolçusu Kenzo Kis də var.
Fransanın qərb sahilindəki Tranş-sür-Mer şəhərində yaşlı britaniyalı qadın istidən huşunu itirərək ölüb. Paris ətrafında isə avtomobildə üçyaşlı oğlan uşağının meyiti tapılıb. Orada temperatur 41 dərəcəyə çatmışdı.
İstilər Avropanın digər ölkələrinə də təsir göstərib. Almaniya, Niderland, Belçika, İtaliya və İspaniya "istilik günbəzi"nin təsiri altındadır. İspaniyada cəmi üç gündə 212 nəfər ölüb.
Ekstremal havanın səbəbi "Omeqa bloku" adlanan təbiət hadisəsidir. Bu, isti hava kütləsini regionda saxlayaraq temperaturu normadan 18 dərəcə yuxarı qaldırır. Meteoroloqlar xəbərdarlıq edir ki, bu istilər insan həyatı üçün birbaşa təhlükədir.
Fransada istilər səbəbindən üç nüvə reaktoru dayandırılıb. Soyutma üçün su çatışmazlığı yaranıb. Fransa və İspaniyada meşə yanğınları başlayıb. Land-de-Qaskon meşəsində 200 nəfər yanğınla mübarizə aparır. Kataloniyada isə 16 hektar meşə yanıb.
