Avstraliya hakimiyyəti ABŞ-nin kimya şirkəti "3M Company"yə qarşı 28 hərbi bazanın çirkləndirilməsi ilə bağlı məhkəməyə müraciət edib.
Baş prokuror Mişel Roulendin mətbuat xidməti bildirib ki, hökumət Federal Məhkəməyə "3M Australia Pty Ltd" və "3M Company" şirkətlərinə qarşı iddia qaldırıb. İddiada 28 hərbi bazada PFAS maddələri ilə çirklənmə nəticəsində dəymiş zərərin ödənilməsi tələb olunur.
Müdafiə nazirinin müavini Peter Halil bildirib ki, hökumət şirkətdən 2 milyard Avstraliya dollarından çox kompensasiya tələb edir. O qeyd edib ki, Müdafiə Nazirliyi artıq təmizləmə və kompensasiya üçün 1,3 milyard Avstraliya dolları xərcləyib. Şirkət həmçinin məlumatları gizlətməkdə ittiham olunur.
"3M Company"nin nümayəndəsi isə bildirib ki, şirkət Avstraliyada PFAS istehsal etməyib və 20 il əvvəl satışı dayandırıb. O, hərbi qüvvələri satış dayandırıldıqdan sonra da köpükdən istifadə etməkdə günahlandırıb.
