Baku TV-nin "Bizdən nə danışırlar?" verilişinin yeni buraxılışı yayımlanıb. Verilişdə Ermənistan baş naziri Nikol Paşinyanın "Telecom Armenia" və "AzerTelecom" arasında imzalanmış tarixi müqaviləni şərh etməsi diqqət çəkib.
"Vestnik Kavkaza" nəşrinin məlumatına görə, Paşinyan hökumət iclasında ölkəsinin regional layihələrdən təcrid olunma siyasətinə son qoymalı olduğunu bildirib. O, tranzit xəttinin Ermənistan üçün strateji əhəmiyyətini vurğulayıb.
"Biz hər zaman deyirik ki, Ermənistan regional tranzit qovşağına çevrilməlidir. Nə qədər çox qlobal axın keçərsə, iqtisadi, siyasi çəkimiz və təhlükəsizlik səviyyəmiz o qədər yüksək olar", - deyə Paşinyan bildirib.
Rumıniyanın "Business Talks" nəşrində dərc edilən məqalədə Azərbaycanın çoxşaxəli xarici siyasəti ölkəni Avrasiyada nüfuzlu "orta güc" dövlətlərindən birinə çevirdiyi qeyd olunur.
Məqalədə vurğulanır ki, Azərbaycan enerji təhlükəsizliyi, nəqliyyat bağlantıları, çoxtərəfli diplomatiya və beynəlxalq əməkdaşlıq təşəbbüsləri ilə Cənubi Qafqazda və daha geniş coğrafiyada sabitlik və əməkdaşlığa töhfə verir.
