"Haber Global" telekanalı Bakıda keçirilən Ümumdünya Şəhərsalma Forumunun 13-cü sessiyası (WUF13) ilə bağlı veriliş hazırlayıb.
Kanalın müxbiri Murat Karataş reportaj təqdim edib. O qeyd edib ki, forumda 182 ölkədən 40.000-dən çox iştirakçı var. Tədbirdə dövlət nümayəndələri, merlər, şəhərsalma mütəxəssisləri, akademiklər və beynəlxalq qurumların nümayəndələri iştirak edir.
"WUF13-ün Azərbaycanda keçirilməsi diqqətəlayiqdir. Səbəb isə 30 illik işğaldan sonra azad olunan Qarabağda aparılan yenidənqurma işləridir. Azərbaycan bu tikinti prosesi ilə bağlı təcrübəsini forumda bölüşəcək. Ağıllı şəhərlər, ağıllı kəndlər, yaşıl enerjiyə əsaslanan yaşayış məntəqələri - bütün bu planlar qonaqlara təqdim ediləcək", - deyə jurnalist qeyd edib.
Murat Karataş həmçinin Türkiyənin də forumda iştirak etdiyini bildirib. Onun sözlərinə görə, Ankaranın fəlakətlərin idarə olunması və davamlı şəhərləşmə təcrübəsi də təqdim olunur.
