Azov dənizində Palau bayrağı altında üzən gəmiyə PUA ilə endirilən zərbə nəticəsində yaralanan Azərbaycan vətəndaşlarının sayı dördə çatıb.
Oxu.Az APA-ya istinadən xəbər verir ki, hadisə zamanı xəsarət alan daha bir nəfər - gəminin bosmanı Rəşad Mədətxanov Yeysk Şəhər Mərkəzi Xəstəxanasının travmatologiya şöbəsinə yerləşdirilib.
Hazırda o, digər yaralılar Samid İbadzadə, Emin Valehov və Namiq Cəfərli ilə birlikdə eyni palatada müalicə alır.
Məlumata görə, yaralılar yenidən həkim müayinəsindən keçirilib. Emin Valehovun sağ qulağında problemlər yaranıb. Namiq Cəfərlinin hər iki qulağında eşitmə narahatlığı var. Rəşad Mədətxanovun baş nahiyəsindən xəsarət aldığı bildirilir.
Hüquq-mühafizə orqanları yaralılarla görüşərək ifadələrini alıb. Zərbənin təfərrüatı məlum olub.
Yaralıların sözlərinə görə, gəminin böyük mexaniki Qismət Əliyev PUA zərbəsi nəticəsində ağır yanıq xəsarətləri alaraq həyatını itirib.
Gəminin kapitanı Fuad Orucovun ayağının sındığı və ağır yaralandığı bildirilir. Ona xilasedici jilet geyindirilib suya endirilib. Yaralıların ifadəsinə əsasən, Fuad Orucov da həlak olub.
