Kaliforniya qubernatorluğuna keçmiş namizəd Barak Obama Şou 2028-ci ildə ABŞ-də keçiriləcək prezident seçkisində iştirak etmək üçün ərizə verib.
Oxu.Az xəbər verir ki, bu barədə "New York Post" qəzeti məlumat yayıb.
Demokrat Barak Obama Şou may ayında Kaliforniya qubernatorluğu uğrunda apardığı seçki kampaniyası zamanı adının ABŞ-nin 44-cü prezidenti Barak Obama ilə oxşarlığı diqqət çəkmişdi. O, seçki bülletenində 61 namizəddən biri olsa da, qalib gələ bilməmişdi.
Şou daha əvvəl San-Fransisko körfəzi bölgəsindəki Alamida şəhərinin meri vəzifəsinə namizəd olub. Həmin seçkidə 16 522 səs toplayaraq 0.2% səs qazanmışdı.
Uğursuzluqlar onu yolundan döndərməyib. Şou növbəti hədəf kimi ABŞ prezidentliyini seçib və namizədliyini açıqlayıb.
Qəzetin yazdığına görə, o, əslində III Sesil L.Şou adı ilə doğulub. 2013-cü ildə ABŞ-nin sabiq prezidenti Barak Obamadan ilhamlanaraq adını dəyişib. O, adını ümid rəmzi adlandırıb.
"Obama mənim kimi insanlar üçün qeyri-mümkünü mümkün etdi - o, ABŞ prezidenti oldu", - deyə Şou bildirib.
