Hindistanda başının və bədəninin üzərindən ağır traktor keçən fermer möcüzəvi şəkildə həyatda qalıb.
Oxu.Az xəbər verir ki, bu barədə "Need To Know" nəşri məlumat yayıb.
İnanılmaz hadisə Hindistanın Uttarakhand ştatında yerləşən Sultanpur Patti kəndində baş verib. Traktorun fermerin bədəni və başının üzərindən keçməsini, onun isə saniyələr sonra ayağa qalxmasını əks etdirən videogörüntü sosial şəbəkələrdə yüzminlərlə baxış toplayıb. İnternet istifadəçiləri bu hadisəni kameraya düşən ən inanılmaz xilas anlarından biri kimi qiymətləndiriblər.
Məlumata görə, bədbəxt hadisə kəndlinin kənd təsərrüfatı texnikasını təmir etdiyi zaman baş verib. Videoda ağır texnikanın qəflətən işə düşərək hərəkətə gəldiyi və nəticədə müvazinətini itirən fermerin nəhəng təkərlərin altına düşdüyü aydın görünür.
Traktor zərərçəkənin bədənini və başını əzib keçdiyi an yoldan keçən bir nəfər dərhal köməyə qaçıb. O, kabinəyə tullanaraq əyləci sıxıb və texnikanı dayandırmağa nail olub.
Hər kəsin öldüyünü düşündüyü bir vaxtda, təkərlərin altında qalan fermer gözlənilmədən ayağa qalxıb. O, heç nə olmamış kimi yerə düşmüş çalmasını götürərək ərazidən uzaqlaşıb. Kənd sakininin bu dəhşətli qəzadan sadəcə yüngül xəsarətlərlə qurtulduğu bildirilir.
