ABŞ-ın Çikaqo məhkəməsi, 2019-cu ilin martında Ethiopian Airlines-a məxsus Boeing 737 MAX təyyarəsinin qəzaya uğraması nəticəsində həyatını itirən Samya Stumonun ailəsinə 49.5 milyon dollar təzminat ödənilməsinə qərar verdi.
Oxu.Az xəbər verir ki, bu barədə Efiopiyanın Fana TV telekanalı məlumat yayıb. Qərar andlılar kollegiyası tərəfindən təsdiqlənib.
Bu təzminat ilk deyil. Bir il əvvəl məhkəmə Boeing korporasiyasının hadisə zamanı həlak olan Şikxa Qarqın həyat yoldaşına 28.4 milyon dollar ödəməsi barədə qərar çıxarmışdı.
Aviaşirkət manevr xüsusiyyətlərinin avtomatlaşdırılmış sistemindəki texniki nasazlığa görə məsuliyyəti öz üzərinə götürdükdən sonra fərdi təzminat iddiaları məhkəməyə daxil olmağa başlayıb. Indiyə qədər Boeing tərəfindən böyük məbləğlərdə ödənişlər edilib: Ethiopian Airlines da daxil olmaqla aviaşirkətlərə 1.77 milyard dollar, qurbanların qohumları üçün təzminat fonduna isə 500 milyon dollar.
Xatırladaq ki, 2019-cu il martın 10-da Əddis-Əbəbə - Nayrobi marşrutu üzrə hərəkət edən Boeing 737 MAX təyyarəsi qalxdıqdan altı dəqiqə sonra yerə çırpılıb. Hadisə nəticəsində 157 nəfər həlak olub.
