Braziliyada bir turist qayanın zirvəsində şəkil çəkdirmək istəyərkən müvazinətini itirib və hündürlükdən yıxılaraq həyatını itirib.
Hadisə iyunun 28-də səhər saatlarında Marika şəhərindəki Pedra do Makako cığırında baş verib. 44 yaşlı Kaio Roşa Agiar Arrabal şəkil çəkdirmək üçün qaya meydançasına qalxıb, lakin müvazinətini itirib.
Yanında olan qadın hadisəni videoya çəkib. Görüntülərdə qadının onu ehtiyatlı olmağa çağırdığı, bir neçə saniyə sonra isə qışqırmağa başladığı eşidilir.
Məlumata görə, Kaio Araruama şəhərindən gələn turist qrupunu müşayiət edirdi. O bu marşrutla ilk dəfə hərəkət edirdi və rəsmi tur bələdçisi lisenziyası yox idi.
Xilasedicilər ərazinin mürəkkəb relyefi səbəbindən hadisə yerinə dərhal çata bilməyiblər. Təxminən dörd saat davam edən əməliyyata helikopter də cəlb olunub. Lakin xilasedicilər çatanda turist artıq vəfat etmişdi.
Mülki Müdafiə Xidmətinin nümayəndəsi Mateus Moura bildirib ki, həlak olan şəxs qayadan təhlükəsiz olmayan istiqamətdə enməyə cəhd edib.
