Fransanın birinci xanımı Bricit Makron, 2025-ci ilin may ayında həyat yoldaşı Prezident Emmanuel Makrona şillə vurması ilə bağlı iddiaları qəti şəkildə rədd edib.
Oxu.Az xəbər verir ki, bu barədə RTL radiostansiyasına birinci xanıma yaxın mənbə məlumat verib. Mənbənin sözlərinə görə, Bricit Makron hələ mart ayında kitab müəllifi ilə söhbəti zamanı bu hekayəni təkzib edib.
Radiostansiyanın həmsöhbəti bildirib ki, birinci xanım həyat yoldaşının mobil telefonunu heç vaxt yoxlamadığını xüsusi vurğulayıb. Qeyd olunur ki, müəllif bu mövqeyi kitabında dərc etməyib.
Xatırladaq ki, Makron cütlüyünün münasibətlərindən bəhs edən 'Un couple (presque) parfait' kitabının müəllifi Tardif daha əvvəl bildirmişdi ki, insidentə səbəb birinci xanımın prezidentin telefonunda iranlı aktrisa Qolşiftə Fərahanidən gələn mesajı görməsi olub. Tardif sonradan aydınlıq gətirərək deyib: 'Mən aktrisanın adını sadəcə ona görə çəkdim ki, bir vaxtlar Parisdə bu cür şayiələr gəzirdi'.
O, bu versiyanı Yelisey sarayında da səsləndirdiyini, lakin bunun rəsmi mövqe olmadığını vurğulayıb.
