Böyük Britaniya Müdafiə Nazirliyi süni intellektin düşmənə zərbə endirmək qərarlarını müstəqil şəkildə verə bilmə imkanını nəzərdən keçirir. Bu təşəbbüs müdafiə nazirinin müavini Alister Karns tərəfindən səsləndirilib.
Oxu.Az xəbər verir ki, bu barədə "Financial Times" qəzeti yazıb.
"Britaniya Müdafiə Nazirliyi müasir müharibənin əsas etik məhdudiyyətlərindən birini yenidən nəzərdən keçirir - döyüş sistemləri üçün hədəflərin həmişə insan tərəfindən seçilməsi prinsipi… Döyüş dronlarının sürətli inkişafı fonunda bəzi məmurlar hesab edirlər ki, döyüşlərdə insanın iştirakına ehtiyac olmaya bilər", - nəşr yazır.
Karns bildirib ki, fövqəladə hallarda döyüş maşınları hədəfləri müstəqil müəyyən edə bilər. Onun sözlərinə görə, operatorun qərar zəncirindən çıxarılması imkanına ehtiyac var, çünki qarşı tərəf belə etik qaydalara əməl etmir.
Hazırkı Britaniya hərbi doktrinası avtonom sistemlərin istifadəsinə icazə versə də, insan nəzarətini tələb edir. Qaydaların yenidən nəzərdən keçirilməsi müasir təhdidlərə uyğunlaşmaq üçün fevral ayında başlayıb.
