Böyük Britaniya Hərbi Hava Qüvvələrinə məxsus iki yeni F-35 qırıcısı texniki nasazlıq üzündən Atlantik okeanındakı Terseyra adasında qalıb. Təyyarələr istehsalçı zavoddan ilk uçuşunu edən tamamilə yeni hərbi təyyarələrdir.
Oxu.Az xəbər verir ki, bu barədə Böyük Britaniyanın The Telegraph qəzeti hərbi mənbələrə istinadən məlumat yayıb. Nəşr qeyd edir ki, Kral Hərbi Hava Qüvvələrinə (RAF) məxsus iki qırıcı təyyarə qəfil texniki nasazlıqlar ucbatından iki aydır ki, adada məcburi dayanıb.
Qəzetin məlumatına görə, təyyarələr ABŞ-ın Lockheed Martin korporasiyası tərəfindən istehsal olunub və Texasdakı zavoddan Britaniyadakı hərbi bazaya çatdırılarkən problem yaranıb. Müqaviləyə əsasən, London ümumilikdə 48 ədəd belə beşinci nəsil qırıcı almalıdır.
