Böyük Britaniyada hər on evdən biri artıq süfrəsini qısmalı olub. Yaşayış xərclərinin durmadan artması səbəbindən təxminən üç milyon ailə qida rasionunu ixtisar edir və ailə yığıncaqlarını azaldır.
Oxu.Az-ın məlumatına görə, bu barədə Böyük Britaniyanın LBC radiostansiyası “Which?” istehlakçı qrupunun araşdırmasına istinadən xəbər yayıb. Yetkin britaniyalıların 85%-i ərzaq qiymətlərindən ciddi narahatdır. Ev təsərrüfatlarının üçdə ikisi pəhriz vərdişlərini dəyişib.
Qiymət artımı ən çox aşağı gəlirli ailələri vurub. Sorğuda iştirak edənlərin 43%-i daha ucuz məhsullara, 37%-i supermarketlərin büdcə brendlərinə, 31%-i isə endirimli mallara üstünlük verir.
LBC həmçinin qeyd edir ki, istehlakçı inamı bu ilin aprelində mənfi 62%-ə düşüb – bu, 2022-ci ildən bəri ən aşağı göstəricidir. Britaniyalılar gələcəyə bədbin baxır və xərcləri azaltmağa davam edir.
İqtisadçılar xəbərdarlıq edir: yaşayış xərcləri böhranı dərinləşdikcə, daha çox ailə ərzaq büdcəsini qısalda bilər. Hökumətin tədbirləri hələlik gözlənilən effekti verməyib.
