Böyük Britaniyanın ABŞ-dakı səfirinin müavini Ceyms Rosko vəzifəsindən kənarlaşdırılıb.
"The Times" nəşrinin məlumatına görə, Vaşinqtondakı rütbəcə ikinci ən mühüm Britaniyalı diplomatın işdən çıxarılması Milli Təhlükəsizlik Şurasının iclasında müzakirə olunan məxfi məlumatların sızması ilə əlaqədardır.
Məqalədə qeyd olunur ki, həmin sızma nəticəsində son həftələr ərzində Britaniya nazirlərinin İrana qarşı müharibə ilə bağlı bəyanatları KİV-ə yol tapıb.
Diplomatın istefası gözlənilməz olub. Mayın 19-da elektron poçt vasitəsilə məlumatlandırılan səfirlik əməkdaşlarına qərarın səbəbi açıqlanmayıb.
Rosko əvvəllər pedofiliyada təqsirləndirilən maliyyəçi Ceffri Epşteynlə dostluq edən səfir Piter Mandelsonun 2025-ci ilin sentyabrında işdən çıxarılmasından sonra beş ay ərzində diplomatik missiyanın rəhbəri vəzifəsini icra edib. O, ABŞ Prezidenti Donald Trampın Böyük Britaniyaya səfərinin təşkilində fəal rol oynayıb.
Rosko səfir vəzifəsinə namizəd kimi nəzərdən keçirilsə də, 2025-ci ilin dekabrında bu posta Kristian Törner təyin edilib.
