Bu həftə ABŞ İrana yeni zərbələr endirdi, İslam Respublikası isə Küveyt və Bəhreynə cavab hücumları həyata keçirdi. İsrail də Livanda eskalasiyanı artırdı.
Oxu.Az xəbər verir ki, bu barədə "Azad İran"ın hazırladığı videomaterialda qeyd olunub. Atəşkəsdən keçən iki ay ərzində gərginliklər nəzarət altına alınsa da, tərəflər müharibə ilə sülh arasında tarazlığı qorumağa çalışıb.
Lakin atəşkəs uzandıqca, Yaxın Şərqdə yeni çıxılmaz vəziyyət riski formalaşır. Bu riskin ən bariz təzahürü İranla ABŞ arasında danışıqların dalana dirənməsidir. ABŞ prezidenti müzakirələrin yaxşı getdiyini bəyan etsə də, İsraillə Hizbullah arasında toqquşmalardan sonra İran tərəfi danışıqların dayandırıldığını bildirib.
Bəzi təhlilçilər bu addımda Livan məsələsinin bəhanə olduğunu, əsl səbəbin İran hakimiyyətindəki ixtilaflar olduğunu bildirirlər. İran Livana vurğu edərək danışıqların uğursuzluğunda məsuliyyəti İsrailin üzərinə atmağa çalışır.
