Özbəkistan oktyabr ayında Daşkənddə Türk Dövlətləri Təşkilatı (TDT) çərçivəsində Türk Elm və İnnovasiya Günlərini keçirəcək.
Bu barədə TDT-nin qeyri-rəsmi sammitinin yekunları üzrə qəbul edilmiş Türküstan Bəyannaməsində bildirilir. Sənəddə liderlər gənclərə, qadınlara və STEM istiqamətlərinə xüsusi diqqət yetirməklə rəqəmsal savadlılıq, süni intellekt, bacarıqların inkişafı və istedadların mobilliyi üzrə birgə proqramlar vasitəsilə insan kapitalının inkişafını hədəfləyir.
Müntəzəm təhsil platformaları, texnoloji və aerokosmik festivallar, həmçinin mübadilə proqramlarının təşkili prioritetlər sırasındadır. "Özbəkistanın 2026-cı ilin oktyabrında Daşkənddə Türk Elm və İnnovasiya Günlərini keçirmək təklifini alqışlayırıq", - sənəddə qeyd olunur.
Dövlət başçıları həmçinin 2025-ci il iyunun 25-də Bişkekdə qəbul edilmiş Kənd Təsərrüfatı Əməkdaşlığı üzrə Strateji Yol Xəritəsində nəzərdə tutulduğu kimi, kənd təsərrüfatında rəqəmsal transformasiyanın təşviqini və aqrar sektora rəqəmsal texnologiyaların tətbiqi üzrə əməkdaşlığın genişləndirilməsini vurğulayıblar.
